2025 жылдың 18-19 сәуірінде Нархоз Университетінде «Мемлекеттік органдар мен азаматтық қоғам институттарының өзара іс-қимылының заманауи мәселелері» атты халықаралық ғылыми-тәжірибелік конференцияның ашылуы өтті. Іс-шараны Нархоз Университетің Құқық және мемлекеттік басқару мектебі ұйымдастырды.
Екі күндік конференция Қазақстан, Германия, Ресей, Өзбекстан мен Қырғызстаннан келген 150-ден астам заң шығару, атқарушы және сот билігі өкілдерін, қоғамдық кеңес мүшелерін, халықаралық және үкіметтік емес ұйымдардың өкілдерін, сарапшыларды, журналистер мен ғалымдарды біріктірді.
Конференцияның басты мақсаты – БҰҰ-ның №16 «Бейбітшілік, әділет және тиімді институттар» Тұрақты даму мақсатын қолдау, сондай-ақ цифрландыру, азаматтық белсенділіктің артуы және жаңа технологиялардың енгізілуі жағдайында мемлекет пен азаматтық қоғам арасындағы серіктестікті дамыту.
Ғылыми жиында Нархоз Университетіне БҰҰ-ның «Академиялық ықпал» (UNAI) бағдарламасы бойынша №16 ТДМ саласында Жаһандық хабтың вице-төрағасы мәртебесінің берілетіндігі жариялануы басты жаңалық ретінде аталды. Бұл мәртебе Нархозға Оксфорд университеті (Ұлыбритания) және Бейбітшілік университетімен (Коста-Рика) қатар берілді. Хабтың төрағасы – Джимми мен Розалин Картер атындағы Бейбітшілік және қақтығыстарды реттеу мектебі, Джордж Мэйсон университеті (АҚШ).
«Бұл – университетіміздің құқықтық білім беру саласындағы жетістіктері мойындалуы ғана емес, сондай-ақ әділеттілік, тұрақтылық және ашық диалог қағидаттарын өңірде және жаһандық деңгейде дамытудағы миссиясы», – деп атап өтті Нархоз Университетінің президенті Қанат Қожахмет.
Конференцияда талқыланған негізгі тақырыптар:
- мемлекеттік органдардың қызметін цифрландыру және ашықтығын арттыру;
- азаматтық қоғам институттарымен өзара іс-қимылдың құқықтық механизмдері;
- қоғамдық кеңестердің рөлі мен нормативтік актілерді сараптау;
- жасанды интеллектіні енгізудің этикалық мәселелері мен тәуекелдері;
- жаһандық өзгерістер жағдайындағы қоғамдық институттардың тұрақтылығы.
Мемлекет пен азаматтық қоғам арасындағы өзара іс-қимылдың теориялық және әдістемелік аспектілері:
цифрлық мемлекет тұжырымдамалары, жаңа қатысу формалары, медиация;
нормативтік-құқықтық процестерге азаматтық қоғамның қатысу механимздері:
құқықтық ақпаратқа қолжетімділік, заң жобаларын сараптау, қоғамдық кеңестердің рөлі;
халықаралық тәжірибе: Орталық Азия, Еуропа және Ресей елдерінің практикалары.
Конференция нәтижесі бойынша мемлекеттік билік органдары мен азаматтық қоғам институттары үшін бірқатар ұсыныстар әзірленді. Атап айтқанда:
- азаматтар мен ҮЕҰ қызметін реттеуді бағалауды (РИБ) күшейту;
- ашықтық және жариялылық бастамаларына мониторинг бойынша жұмыс тобын құру;
- цифрлық шешімдерді әзірлеуде ғылыми қауымдастықпен ынтымақтастықты арттыру;
- ұлттық даму стратегияларын әзірлеуде конференция материалдарын пайдалану.
Нархоз Университетіндегі бұл халықаралық конференция – Қазақстанда және тұтастай Орталық Азияда диалог мәдениетін, азаматтық қатысуды және тиімді институттарды дамытудағы маңызды қадам.
