Оқуға түсушілерге ақпарат

PhD философия докторларын даярлау бағдарламасы бойынша докторантураға ақылы негізде қабылдау шетел тілін меңгергендігін растайтын халықаралық сертификат негізінде (шетел тілін меңгерудің жалпы еуропалық құзыреттеріне сәйкес) және білім беру бағдарламалары тобының бейіні бойынша қабылдау емтиханының нәтижелері бойынша жүзеге асырылады. Талапкер 100 мүмкін балдың кемінде 75 балын жинауы тиіс.

Докторантураға түсушілерден өтініштерді қабылдау жоғары және (немесе) жоғары оқу орнынан кейінгі білім беру ұйымдарының қабылдау комиссиялары және Ұлттық тестілеу орталығының ақпараттық жүйесі (app.testcenter.kz) арқылы келесі мерзімдерде жүзеге асырылады:

– күнтізбелік жылдың 3 шілдесі мен 3 тамызы аралығында;
– күнтізбелік жылдың 28 қазаны мен 10 қарашасы аралығында.

Докторантураның білім беру бағдарламалары топтары бойынша қабылдау емтихандары келесі мерзімдерде өткізіледі:

1. күнтізбелік жылдың 4–20 тамызы аралығында;

2. күнтізбелік жылдың 19 қарашасы мен 11 желтоқсаны аралығында.

4–20 тамыз аралығында өткізілген қабылдау емтиханының сертификаты ағымдағы жылдың 1 желтоқсанына дейін жарамды.

19 қараша – 11 желтоқсан аралығында өткізілген қабылдау емтиханының сертификаты келесі жылдың 1 наурызына дейін жарамды.

Өтініш беру кезінде талапкер бір жоғары оқу орнын және бір білім беру бағдарламалары тобын көрсетеді. Докторантураға «Магистр» дәрежесі бар және кемінде 9 ай еңбек өтілі бар тұлғалар қабылданады.

1. Еркін нысандағы өтініш;
2. Білім туралы құжат (қабылдау комиссиясына тапсырған кезде түпнұсқасы);
3. Жеке басын куәландыратын құжат (жеке тұлғаны сәйкестендіру үшін);
4. Шетел азаматтарын қоспағанда, Ұлттық тестілеу орталығы берген мемлекеттік тілді меңгергендігін растайтын ресми сертификат (ҚАЗТЕСТ);

5. PhD докторантурасына түсушілер үшін шетел тілін меңгергендігін растайтын сертификат:

Ағылшын тілі бойынша:

• IELTS Academic – кемінде 5.0 балл;
  TOEFL IBT – кемінде 35 балл;
  TOEFL ITP – кемінде 417 балл;
  TOEIC – кемінде 550 балл;
  Duolingo English Test – кемінде 80 балл.

Неміс тілі бойынша:
– DSH (В1 деңгейінен төмен емес);
– TestDaF (В1 деңгейінен төмен емес).

Француз тілі бойынша:
– TFI – оқу және тыңдалым бөлімдері бойынша В1 деңгейінен төмен емес;
– DELF – В1 деңгейінен төмен емес;
– DALF – В1 деңгейінен төмен емес;
– TCF – В1 деңгейінен төмен емес.

6. № ҚР ДСМ 175/2020 бұйрығымен бекітілген 075/у нысанындағы медициналық анықтама (электрондық форматта). Шектеу шаралары, төтенше жағдайлар енгізілген жағдайда анықтама кейінірек ұсынылады;
7. 3x4 көлеміндегі алты фотосурет;
8. Қазақстан Республикасының Еңбек кодексіне сәйкес еңбек қызметін растайтын құжат (шетел азаматтарын қоспағанда);
9. Соңғы 3 жылдағы ғылыми жарияланымдар тізімі (бар болған жағдайда), зерттеу жоспары;
10. Алдын ала іріктеу нәтижелері («Денсаулық сақтау» білім беру саласы бойынша).

4), 5) және 8) тармақшаларда көрсетілген құжаттар түпнұсқа және көшірме түрінде ұсынылады, тексерілгеннен кейін түпнұсқалары талапкерге қайтарылады.

TOEFL ITP сертификаты бар тұлғалар докторантураға түсу емтиханына дейін ағылшын тілінен қосымша тестілеуден өтеді.